Turmush — Чүй облусунун Ысык-Ата районундагы Кочкорбав айыл өкмөтүндө көп жылдар бою жасалбай келген иштер аткарылып жатат.
Айыл өкмөттүн берген маалыматы боюнча, Курманалиев айылынын кире беришиндеги 1 чакырым жол асфальтталып, айыл аймактагы эки конушка электр жарыгы берилди.
«Жол учурда бүтөйүн деп калды. Акыркы күндөрдөгү аба ырайы ишти бир аз кармап жатат. Ички жолдордун айрымдарына союз учурунда асфальт төшөлгөн. Ал эми бул айылдын кире беришине биринчи жолу асфальт төшөлүп жатат. Буга Чүй облусунун өнүктүрүү фондусунан 4 млн 834 миң 292 сом, жергиликтүү бюджеттен 265 миң 710 сом бөлүнгөн.
Мындан тышкары, Д.Курманалиев айылындагы жаӊы конушка трансформатор жана элекр чубалгылары орнотулду. Бул жаӊы конуш 2016-жылы түптөлгөн. Ошондон бери электр жарыгы жок, ар кайсы жерден тартып келип, жашап жатышкан. Анысы алсыз болуп, чыӊалууну көтөрө албай, өчө берчү. Эми минтип электр мамылар орнотулуп, электр зымдары тартылып бүттү. Иштер жүрүп жатат. Жакында жарык берилет. Ага дагы Чүй облусунун өнүктүрүү фондусунан 1 млн 636 миң 819 сом бөлүнүп, жергиликтүү бюджеттен 113 миң 688 сом каралды. Азыр ал конушта 26 түтүн жашап жатат. Негизи 42 жер тилкеси бар. Эми электр жарыгы тартылгандан бери элдер көчүп келе баштаганы байкалып жатат.
Ошондой эле, Кеӊеш айылынын Ч.Айтматов көчөсүндөгү жаӊы конушка дагы жаӊы электр мамылар орнотулду. Ага жергиликтүү бюджеттен 167 миң 700 сом бөлүнгөн. Бул жаӊы конуштан 1996-жылы жер тилкеси берилген экен. Элдер 1998-жылдан баштап үй куруп, жашай башташкан. Азыр 22 түтүн жашайт. Алардын электр жарыгы жакын арада кошулат. Бир аз гана иштери калды», - деди айыл өкмөт башчысы Эркин Керимкулов.
